أمة إقرأ...................غصبن عليها تقرأ

[color="Teal"]شوفوا ... لا يجيني واحدن .. ويدرعم في خشم أمي .. ويقول لي : إلا أنا أقرأ ... أنا مثقف ..أقرى جرايد

ومجلات كل يوم ...وإلا لي سمعت عن شي ..
على طول أنصى ( Google ) ..وأبحث عن اللي أبيه ..وألقاه على طول قدام وجهي وأقرأفيه!!!!!!!!!!!!!!!1

ما أقول إلا جعل ( Google ) وربعه اللي ما نيب قايله ..إن كان ماخربنا الا هم ...!!

يعني مثلا .. يطلب الدكتور من الفرقة كله بحث في موضوع معين ..

وعندي طالبين .. الأول الله يسلمكم ..نصى لـــي//
Google
وكتب كم عنوان وضغط زر//
بحث

بكل بساطه ..ولقاله مليون لينك .. عاد تحسبونه قرى شي !! ..لا .. ابد .. اللينك اللي يعجبه يضغط عليه ..
ويقرأ أول جملة وآخر جمله ... وهات يا
نسخ
في ملف وورد .. يعني باختصار
اللينك اللي يحب عنوانه من أول نظره .. اعرفوا انه انضم الى زوبعة الكلمات المتراصة ..التي تسمى ببحث!!!!!!!!!!!!
>>> نقص وزني كيلو بعد هالجمله ..!!

والثاني الله يسلمكم أيضا ..راح لمكتبة الجامعة بعد الليكتشر ... وقعد يحوس فيها .. لين يلقى الكتب اللي تخص بحثه .. ويمسكهن واحدن تلو الآخر .. ويجلس يتصفح هذا ... ويقرا في هذا .. بتمعن وكأنه يدرسها ..

يعني هنا سالفة الـــ......الـــــــــ.... هذاك وش اسمه ....

في المخ .... يعني هو المستفيد الأول من بحثه

.. مهب الدكتور وطقته ..وأظن ما يخفاكم وش يسوون الدكاتره ببحوثنا . ...
ولما رجع للبيت .. راح لمكتبتهم المصغرة >>>> اهله مثقفين مو مثلكم .. وكمل بحثه ... وطبعا قبل ما يختم رجع للنت وشيك على قوقل وقرأ شوي وعدل وبدل بحرفنه .. قبل ما يحط نقطة النهايه .... !!

أبي أدخل في صلب الموضوع<<يعني ترى الي فوق مقدمه ... واللي يبي يدخل معي .. حياه الباب مفتوح ..!!
-------------------------------------------------------



الرسول محمد _ عليه الصلاة والسلام _ كان (أمي ) .. ما يعرف يقرى ولا يكتب ..وهالكلام قبل نبوته ... ولما نزل عليه جبريل في أول الوحي وهو معتكف في الغار ... ما قاله يامحمد اكتب .. والا اتق الله والا أسجد ..!!
قاله : " إقرأ" وعادها 3 مرات .... أول آيه نزلت .. وعلى نبي كريم كان خاتم الأنبياء والمرسلين ..تامرنا ب" القراءه " .." إقرأ باسم ربك الذي خلق " ..
.
.
.
-------------------------------------------------------------------

.
.
اذن أول ينبوع للمعرفه .. وأول كتاب للمسلمين .. عشاق القراءة .. هو القرآن الكريم .. " تنزيل الكتاب من الله العزيز العليم " ..يعني انتوا في نعمه من جد .. يكفيكم من الدنيا ..أن تقرأوا القرآن وتتدبوا آياته في كل يوم .. وتبحثون في التفاسير عن أشياء ممكن ما تفهمونها ..

واذا مو مصدقيني .. روحوا اسألوا اهلكم واحد واحد عن تفسير سورة الفلق .. او معنى كلمة ( وقب ) !!

بيردون عليكم بشئ واحد وهو (( التناحه )) ..

(( وهذه دعوة للتدبر والتمعن والبحث في كتاب الله عز وجل ))

************************************************
الأمثلة على الثقافات الغصب واجد
^
نجي لشكسبير ... وما أدراك ما شكسبير ..

هذا الله يسلمكم >>> مصره على يسلمكم ..كان أمي .>> موب أبوي
او بمعنى أصح تعليمه ابتدائي ..وماقدر يكمل لأنهم على قد حالهم وما عندهم فلوس .. بس أمه هذي انسانه رهيبه ..كانت كل يوم وبعد ما فصل من المدرسه .. تمسكه وتدخله المكتبه حقت بيتهم .. وتفتح له كتاب وتجلس تقر أ له ... مو تقرأ عليه !!
.. وطبعا كانت هالإنسانه الرهيبه ميولها أدبيه ..فأخينا في الله صار مغرم بالأدب .. وبعد ما صجته أمه بالكتب اللي عندها ..بدى يروح ويشتري على ذوقه .. ويقرأ .. ويقرأ ,, ويقرأ بالثلاث ... وهالقراءة وش خلته .. !! خلته بصمه في جبين العالم مو بس ديرته .. وملأ الدنيا وشغل الناس وصار ألعن من المتنبي !! ..


ويقولك .. هذا " شكسبير " ولد أمه .. يكتب عنه بحث في هالعصر كل ( عشر دقائق ) ..!!

وانتوا ما تبون تخصصون 10 دقايق في اليوم علشان تقرأون في كتاب !!

أنا ما ذبحني إلا هالأجانب لي راحوا يمثلون مسرحياته ورواياته ..!! قسم يحرفون فيها تحريف يقطع القلب ..
من شاف منكم فيلم ( روميو وجولييت ) ؟؟؟؟؟.

ليش ؟؟!!
لأنه

اولا روميو وجولييت ) وبكل بساطه " مسرحيه " مو فيلم .. علشان يمثلونها في بيت وشوارع وكنيسه ومسبح !!...

وثانيا : المشهد الأخير ..وهو أهم مشهد اللي يموتون فيه البطلين الاثنين على قبر في المقبره .
مو في كنيسه .. الله يكنسهم في نار جهنم .. !! . .

ثالثا: لما يموت روميو .. جولييت تطعن نفسها بخنجر .. مو

بمسدس .. !! هذا غير أزياءهم اللي لابسينها ومسوين دمج بين الحاضر والماضي .. يازعم ان المخرج عاوز كده ..ويبي يلفت نظر المشاهد .. !!

درسناها بالجامعه ..وبالعاده الدكتورات اذا اخذنا روايه والا مسرحيه وقد مثلوها بطريقه حلوة وبدون تخريب يقولون لنا اشتروا الشريط وطالعوه << للفائدة مهب للدشاره خخخخخ!! ..
اما ( روميو وجولييت ) ما قالوا لنا اشتروه .. ومن لقافتي خذته من وحده ,,وشفته .. ويوم خلص .. صحت .... بس مو على الأحداث ...!! لا .... صحت من القهر ...!!>> كني طلعت عن الموضوع شوي !! >>> وش شوي الا كثير . .!!
---------------------------------------------------------
(هنا دعوة لقراءة الرائعة " روميو وجولييت " )

*** أنا ما أقولكم صيروا " شكسبير " ..!! ..

بس صدقوني اذا تبون تصيروا " مهذبين " و " راقين " في اسلوبكم وتعاملكم ..لا زم تقرأون ..هذي الخصلتين مستحيل تجي بدون قراءة ..وألقوا نظره على مجتمعنا ..وشوفوا .. !!

اغلب المثقفين اللي بطبيعة الحال قارئين ونهمين بعد ..تلاقونهم مهذبين في تصرفاتهم .. وراقين في التعامل.. يعني باختصار " هذبتهم الكتب " ...!! موب....؟!!! (
Google
) >>> ومازال الحقد على هذا المحرك مستمر ..!!

سبحان الله ... الكتب تعطي لصاحبها الوقار والحكمه .. وحب الحياه ..
ومستحيل تلاقي واحد عربيد ... زنديق ... همجي ... ومستكلب .. ويكون مثقف .. وقارئ ..!!
العلم يبني بيوتا لا عماد لها والجهل يهدم بيت العز والشرف


## أتوقع لو كنا شعب ( قارئ ) .. ماكانت احوالنا كذا ومشاكلنا ما نعرف كيف نحتويها ..!!
1/ ولدهم يسرق ..و الا يطق عيال خلق الله .." تعال يا حمار بأكسر لك يدك علشان تعرف كيف تسوي كذا مره ثانيه ..!! ... ويعطيه هذاك الكف اللي يبرم رقيبته الضعيف !!

2/ بنتهم المراهقه تكلم واحد بالماسن ..؟؟.. " لو انك هاقيتن اني بادفنك وانتي حيه ..كان ما سويتي كذا "!! وهات يا تكفيخ !!

3/ ولدهم المراهق >> ياليل المراهقين .. لقوا معه بكت زقاير .. او تاخر برى البيت .. يطردونه و : ارجع من المكان اللي جيت منه ..!! ..وين يروح ؟؟ .. للشارع ؟؟ .. هذا هو أول طريق للضياع !!

>>>> أنواع العنف الجسدي والنفسي ..!!
## لو كنا شعب قارئ / مثقف .. كان ثلاثة ارباع مشاكل المتزوجين واللي توهم متملكين بيلاقون لها حلول

وبكل سهوله ..!! .. مو على طول " طلاق "!! ..

والا كل واحد يشك بالثاني ..والإ لي مر على زواجهم 5 أو 6 سنين .. ياربيه وراه ماعاد يحبني زي أول ولا يقولي كلام حلو ..؟؟؟...والا يا قلبيه !!.. وراها ماعاد تدلعني ولا تهمزني ... مثل قبل لين جيت من الدوام ..؟؟

اذا لاحظنا تغير ولو طفيف في علاقاتنا ورى ما نبحث ونقرى في هالكتب .. ؟؟!!! ليه لازم تتفاقم المشاكل وتصبح كوارث وحنا مكانك سر ؟؟!! ...أغلب مشاكلنا حلولها عاديه وبسيطه جدا ... بس الجهل شين !!
تتوقعون لو انهم قروا كتاب ( الرجال من المريخ .. النساء من الزهرة ) بتستمر مشاكلهم في نفس دوامة الغباء اللي هم عايشين أو معيشين أنفسهم فيها ؟؟!!


(هنا دعوة لقراءة كتاب " الرجال من المريخ ..النساء من الزهره " لجون غراي )
.
.
------------------------------------------------------------


هل انت عندك دوامين ؟؟!! .... أو طالب بجامعه وترجع هلكان .. وعندك امتحانات ؟؟... والإ انتي موظفه بمستشفى والا بنك !!؟؟ودوامك متأخر ..!! ...لاتجون وتقولون لي ما في وقت ...لان هالجمله لو رددناها بنصدقها وهي كذبه من الأساس !!..
كيف ممكن تنظم وقتك بين العمل ووقت الراحه والقراءة ؟؟
الكتب واجده ... وفي جميع مجالات الحياة ..!! ... واكيد انكم كلكم في قمة شبابكم ... يعني لابد تستزيدون وتنهلون لين خشومكم ..!!

تبون تقرأون في الجديد / القديم من الروايات ، السير الذاتيه ، كتب علم النفس ، السياسه ، مشاكل المجتمع ،والشعر وغير ه ؟!!
اذن ....خصص الكتاب المناسب للوقت والمكان المناسب !!
&&& حط لك على السرير او فوق الكمدينه ( كتاب) ..تقرا فيه قبل النوم..وأول ما تقوم >>> حشى على فكة الريق !!..... طبعا الكتاب هذا تكون صفحاته معقوله 100_ 300 صفحه ..والاهم من هذا كله ما يكون كتاب سياسي او اقتصادي >>> الله من الكوابيس ..!!

&&& حط في مكتبك في العمل كتاب..عاد هالكتاب لازم يفتح نفسك على الشغل..يعني لما تقرى فيه وسكره ..تحس انك متحمس .. ومتجدد.. وتصير كنك نحله تطوف بين الأزهار.. وتبي تسوي أي شي
من الظفاره ...... كتب علم النفس والاجتماع ... مناسبه لهالمكان..!!

&&& الكتب القصيره والصغيره.. إقرأ فيها وإنت عند الاشاره .. او وانت تنتظر في العياده وماشاء الله دكتورك شاطر ..

يعني خصص كتب لللطعات..وأوقات الانتظار والطوابير والزحمه والقرف.. بدل ماتعصب وتركه حياتك !!
لا وابشركم فيه احصائيه تقول الانسان يقضي تقريبا 5% من عمره وهو ينتظر !!!...ورى ماتقرون في هالوقت ازين لكم ؟؟!!
&&&..
حط لك مكتبة بالحمام وانتم بكرامة [/COLOR].. اذا لهالدرجة ماعندك وقت وش اسوي بك هذا افضل حل ؟؟!!المكتبه هذي حط فيها المقالات القصيره والأشياء اللي ماتاخذ منك وقت طويل وممكن بعض الملاحظات التذكيريه ..وعاد انتبه لعمرك ...لاتنسى روحك بالحمام !!..
يقولك أغلب المثقفين وحملة الماجستير والدكتوراه يذاكرون ويقرءون ويكتبون وهم في الحمام !!

***********************************************
قبل فترة طلع لنا ( الكتاب الالكتروني ) ..اللي راهن الكثير على انه راح يتغلب على الكتاب العادي..
وبعضهم أقسموا بأننا ماراح نشوف بعد كذا كتب تحتوي على أوراق ..!!
هنا من انتصر؟؟!!... محد ينكر قيمة الكتاب الالكتروني ..
ولكن بقيت الأوراق صامدة واكثر شعبيه في وجه التكنولوجيا .!!
*********************************************
قل لي ماذا تقرأ .. أقل لك أي لحية أنت !!

@في الأدب.. / انت تقرا لكتاب مشهورين وعالميين .. وأدباء راقين .. وشعراء من الوزن الثقيل..
.. اذن أنت انسان اكثر .. راقي.. وصاحب فكر نظيف .. تسعى لتطوير روحك بالمفيد ..تسعى لتثقيف نفسك لغويا ..وسلوكيا ..!!
@أنت تقرأ ادب هابط ... رخيص .. من أجل تضييع الوقت فقط .. انت تقرأ روايات عبير وأحلام وطقتها ..
إذن انت إنسان ساذج .. تبحث عن المتعه.. العديمة الفائده.. وليس عن ثقافه..!!
وقيسوا على ذلك جميع أنواع الكتب والسير والثقافات الأخرى ..!!

********************************
كتب لازم تكون في مكتبتك الشخصية ..
( البدايه والنهايه لابن كثير __ السيره النبويه لمحمد الصوياني " ثلاث مجلدات" __موسوعة
قينيس 2008 لسعة "الصدر والثقافة العامة" __ قوة عقلك الباطن لجوزيف ميرفي __ البؤساء لفيكتور هيجو __ حياة في الإدارة لغازي القصيبي ـــــــــ افعل شيئا مختلفا ــــ لاتقل لا ابدا ً :مااذكر مؤلفينهن بالضبط مين بس انهن توووووحف ) .. *********************************
نلاحظ هنا في المنتدى .. المواضيع اللي فيها مهايط ماله سنع..تشوف الردود عليه بالهبل ..وانا وحده من هالمهبل !!..<<الإعتراف بالحق
والمواضيع اللي متعوب عليها .. ويلزمك قراءتها من البدايه وحتى نقطة النهايه ..وممكن تكون مثبته..تلاقي الردود قطبه !!..ليه ؟؟
ما في وقت يقرون .. يختي حرام يضيعون وقتهم الثمين على موضوع ثقافي؟؟!!
There is NO time
سبحان الله من كثر مانقول ماعندنا وقت .. ونقعد نضيع يومنا بشغلات تافهه ..ربي ما يطرح البركه فيه !!..


نصيحة اخيرة
لاوديتوا أهلكم للسوق .. مروا جرير لاتشرون كتب بس تصفحو الكتب ..
وانا واثقة انننننننننننننكم <<بتطلعون بدرزن كتب ..خخخخخ
..
أمنية كل واحد يدخل هنا ويصل الى هذه النقطة وكان راعي قراءة أنه يكتب اسماء الكتب او اسم الكتاب اللي قراه واستفاد منه..
واذا ماقرأ كتب أو مهب راعي قراءة واقتنع بعد موضوعي الجميل << واثقة الأخت
إنه يجرب ويقرأ يكتب لنا ماذا اختارت نفسه ليقرأ..ولا انسى ان اذكركم واذكر نفسي واياكم بأن يكون سيد ماتقرأ " كتاب ربك "ودمتم بثقافة واطططططططططططططططلاع

مع تحيات ولد الشيوخ



وشكرا وشكرا